દિલ્હીથી શિરડી જઈ રહેલી ઈન્ડિગોની ફ્લાઇટમાં એક શરમજનક ઘટના બની છે. જેમાં એક નશામાં ધૂત એક મુસાફરે એર હોસ્ટેસ સાથે છેડતી કરી છે. આ ઘટના શુક્રવારે બપોરે બની હતી, જ્યારે ફ્લાઈટ શિરડી એરપોર્ટ પર ઉતરવાની તૈયારીમાં હતી. આ દરમિયાન છેડતીની ઘટના બની છે. જો કે પોલીસે રવિવારે આ ઘટનાની માહિતી આપી છે.
પોલીસના જણાવ્યા મુજબ આરોપી મુસાફરે ફ્લાઈટની અંદર ટોયલેટ પાસે એર હોસ્ટેસને અયોગ્ય રીતે સ્પર્શ કરવાનો પ્રયાસ કર્યો હતો. આ કૃત્ય એર હોસ્ટેસ માટે અપમાનજનક અને અસહ્ય હતું. તેણે તરત જ તેના ક્રૂ મેનેજરને આ વિશે જાણ કરી. આ પછી જ્યારે વિમાન શિરડી એરપોર્ટ પર ઉતર્યું, ત્યારે સુરક્ષા અધિકારીઓને આ બાબતની જાણ કરવામાં આવી હતી.
સુરક્ષા કર્મચારીઓએ તાત્કાલિક કાર્યવાહી કરી અને મુસાફરની અટકાયત કરી અને તેને નજીકના રાહતા પોલીસ સ્ટેશન લઈ જવામાં આવ્યો હતો. ત્યાં તેની સામે છેડતીનો કેસ નોંધવામાં આવ્યો હતો. પોલીસે જણાવ્યું કે આરોપીની મેડિકલ તપાસ પણ કરવામાં આવી હતી, જેમાં સાબિત થયું કે તે નશામાં હતો.
પોલીસે આરોપીઓને નોટીસ પણ ફટકારી છે અને કાનૂની પ્રક્રિયા આગળ વધારવામાં આવી રહી છે. આ કેસની ગંભીરતાને ધ્યાનમાં રાખીને પોલીસ દરેક ખૂણાથી તપાસ કરી રહી છે. એરલાઈને પણ આ અંગે કડક પ્રતિક્રિયા આપી છે અને કહ્યું છે કે આવી ઘટનાઓ બિલકુલ સહન કરવામાં આવશે નહીં. આ ઘટનાએ ફરી એકવાર ફ્લાઈટ્સમાં કામ કરતી મહિલા કર્મચારીઓની સુરક્ષા અંગે ચિંતા વ્યક્ત કરી છે. આવા ઘણા કિસ્સાઓ છે જેમાં એર હોસ્ટેસ સાથે ગેરવર્તણૂક કે છેડતીના કિસ્સાઓ પ્રકાશમાં આવે છે. એરલાઈને આશા વ્યક્ત કરી છે કે આરોપીઓ સામે કડક કાર્યવાહી કરવામાં આવશે, જેથી ભવિષ્યમાં બીજું કોઈ આ પ્રકારની કૃત્ય કરવાની હિંમત ન કરે અને આવી ઘટનાઓને રોકી શકાય.